صورة تعبيرية تنويه: شخصية ياسين وأحداثها من وحي الخيال، وأي تشابه بينها وبين الواقع هو من قبيل المصادفة.
هاذي حكاية ياسين تزاد وفي فمو ملعقة ذهب
ياسين مفشش بزاف لي بكا عليها كايشريها لي باه
ياسين عاندو بلاكار عامر بالمونيكات.. كايعجبو يلعب ببهم.. بّاه مايقدرش يݣول لياسين "لا.. حشومة هاذشي".. بغايتك تكون راجل.
واحد النهار ياسين مبقاوش كايعجبوه المونيكات.. بّاه فرح بزّاف وجاب ليه كادو... شرا ليه mikaza
ياسين شاف الكرة لأول مرة في حياتو.. معرفش منين يجيها.. رسم وجه في mikaza وجبد الصباغة والعكر وبدا كايعكر ليها.. دخل بّاه شاف الكرة مزوقة بحال العروسة نتف شعرو عض صباعو وقرر يخرجو من العالم الوردي لي عايش فيه ويشوف تيران ديال بصح فراس الدرب. الكرة خرجات للتوش فين كان واقف ياسين وبّاه.. ياسين عنّق الكرة ومابغاش يطلقها وبدا كايبكي.. كولشي كايطلب ويرغب في ياسين يعطيهم الكرة. ياسين كٰرَمْ على الكرة وباءت جميع المحاولات لانتزاع الكرة من ياسين، في النهاية قرر بابات ياسين يشري كرة جديدة.
ياسين عجباتو الكرة.. جمع فرقة في الدرب وشرا ليهم تونيات وليبات وكوضاسات وبدا كيحبس ليهم. ياسين كان غليض بزاف القنت فين مشات الكرة كتماركا.. قرقتو ديما خاسرا.
ياسين غضب وقطع الماكلة ومابغاش يسكت من البكا. بّاه بدا كيشري ليه الماتشات.. ويشري ويشري.
كبر ياسين والأحلام ديالو كبرات.. قبل ما يموت بّاه وخلّا ليه فرقة كبيرة فلوس كثيرة. شرا اللعابة والمدربين ولاربيطات والفراقي إلا فرقة وحدة في حي شعبي معندهاش مع البيع والشرا وخرجات العينين فياسين. حتى واحد ما كايقوليه "لا".. بّاه علمو يجيب ليه حليب الحمارة إيلا بغاه.. القرد إيلا بغاه يولد يولدو ليه.
ياسين حلف ينتقم من هاذ لوليدات.. راهن بثروتو باش ينسف هاذ الفرقة... مقدرش عليهم. شرا منتخب وطني ومقدرش يربحهم. القضية خرجات على كرة القدم ولات عقدة عند ياسين وكابوس عندو. فاش كيلعب معاهم كايجي ياسين للتيران ضارب كوسطار وجايب معاه الحياحة والطبالة والغياطة.. فاش كايخسر كايبدا على البكا.
ياسين متعود يخسر عادي مكايبكيش إلا مع هاذ الفرقة دارت ليه الحلاقم من كثرة البكا والتغبان.
ياسين خسر عاودتاني.. ليستمر البكاء، وتستمر العقدة.
ياسين نسى نصيحة بّاه: "لا.. حشومة هاذشي".. ياسين بغايتك تكون راجل"!!!!
ياسين طلعات ليه الكورة في الراس شرا حمامة
ركب فوق الحمامة
للسما طارت بيه الحمامة
كايشوف الناس بزقة على ظهر الحمامة
طاح من ظهر الحمامة فوق قبة حمرا
بزقاتو الحمامة بزقة كارمة
في القبة ياسين كايتهجى مكيفرقش بين الليف والعصا
حنا لي كانستاهلو العصا
خالينا ياسين كايلعب العشرة
هاذي خبيرة ياسين ولد الفشوش مشات مع الواد وانا بقيت مع لجواد.
