الاثنين 24 سبتمبر 2018
سياسة

عبد الإله الجوهري: الهدرة مع عيوش بلا خشيبات كتحشم!!

عبد الإله الجوهري: الهدرة مع عيوش بلا خشيبات كتحشم!! عبد الإله الجوهري (يمينا) ونور الدين عيوش

الهدرة مع عيوش، وأمثال عيوش، بلا خشيبات كتحشم، لأنه راجل ما كيعراق ما كيحشم، خصوصا وأنهو عارف بأننا عايقين بيه وعارفينو علاش مطوي.

سي عيوش بغا يعزلنا عن محيطنا الثقافي ويخلينا غير كنبرققو بعويناتنا، ومن بعد نوصلو للحيط ونقطعو كل علاقة مع الثقافة ديالنا وما نلقاو والو قدامنا، باش نمشيو من بعد كنجريو عند ماماتنا فرنسا ونقولو ليها ثقافتك هي اللي كاينة وها العار لا ما تقبلي علينا وتدخلينا تحت جناحك بشكل كامل..

قالك وليداتنا خصهوم يتعلمو بالدارجة باش يفهمو لأنهم كيلقاو صعوبة ففهم الكلمات بالعربية الفصحى، وحنا كنقولو لو: واش منين تعلمنا الفرنساوية فالابتدائي كنا كنقشبلو شي كلمة بالفرنساوية، ومع ذلك تعلمناها شوية بشوية وبإمكانيات ذاتية وأصبح الكثير منا نابغة فيها. وزايدون أساط عيوش، واش كاينة شي دولة فالعالم كتعتمد على التدريس بالدارجة وبلغة زنقاوية ديال البطبوط والبغرير وزعلوك؟ واش فرنسا ديالك كتدرس باللهجة الزنقاوية اللي باغي تمرر لينا؟..

خصك تفهم أولد عيوش وانجالك المقودين اللي ما عندهم حتى علاقة بهاد البلاد، لأنهم كلهم عندهم جنسيات أخرى، وخاصك تسرط بالمزيان أنت وياهم: بأن اللغة العربية عندها امتداد فكري وثقافي وتراثي في الزمان والمكان، ونتا وامثالك اللي باغيين تقتلو هاد الامتداد وتقلعوه من جذورو ما فيديكومش. لأننا عايقين بيكم وبخططكم المارجة...

سير كن تحشم الله يرد بيك وبامثالك، من وليدات واحفاد ليوطي، وتلاميذ بيرنار هنيري ليفي واللي ما عند باباه حتى وجه علاش يحشم..

- عبد الإله الجوهري، مخرج وناقد سينمائي