الجمعة 29 مارس 2024
فن وثقافة

خولة فرحات: حكاية الأندلس الجزء الثّامن: الدّولة العامرية وحكمٌ من وراء حجاب (الجزء الثامن)

خولة فرحات: حكاية الأندلس الجزء الثّامن: الدّولة العامرية وحكمٌ من وراء حجاب (الجزء الثامن) خولة فرحات
توقفنا عند الحَكم ابن عبد الرحمن الناصر الذي كان خير خلف لخير سلف واستكمل بناء مجد الدّولة الأموية هناك في فردوسنا المفقود؛ ولكن واااالكن خونا غايزبّلها فالأخير يمكن ماشي لخاطرو؛ الحَكم غادي يجيه الشلَل في آخر عهده، فاستخلف ابنه البِكر اسمه هشام بن الحَكم بن عبد الرّحمن النّاصر وكان عمره فقط 12 سنة؛ طفل صغير استُخلِف على بلاد عظيمة تحوطها الأهوال من كل جانب... علاش قلت زبّلها؟! حيت بنو أمية فيهم بزاف ديال الرجال لي ممكن ياخذو الحكم من وراه ومايديرش طفل صغير مازال باغي يلعب وتعطيه كل هذه الأعباء الثقيلة دار هاد الكارثة ثم مات في سنة 366ه وجلس الطفل على عرش الخلافة الأموية و بما انه لم يبلغ سنّ الحكم بعد جعلوا عليه مجلساً للوصاية؛ شكوون فيه؟ 
- الحاجب: جعفر بن عثمان المصحفي
- قائد الشرطة: محمّد بن أبي عامر (يمني ولم يكن أموياً) 
- أمّه صُبْح 
محمّد بن أبي عامر غادي يحگر لينا على الدريري غادي يولي عندو طموح باش ياخذ هذا المُلك العظيم أول حاجة دبّر مكيدة وسَجن الحاجب جعفر بن عثمان (الوصي الاول) ثمّ قتله بعد ذلك. بالنسبة لأم هشام صُبح كان حالها ساهل كانت عا دريويشة مسكينة يعني حبسها فالقصر وخلاها فتقلّد الأمور وبدأ يحكم في الاندلس باسم الخليفة الصغير ولكن مازال خاصو الخدمة باش يقوّي المنصب ديالو اش دار؟!: تجوّج.. نعم تزوج ابنة غالب بن عبد الرحمن لي هو أمير الجيش فضمن بهذا ولاء الجيش ولكن هيهااات نسيبو عاق بيه و علِم خطّته و مشا قالها ليه فاااص اش دار محمّد بن ابي عامر؟! دبّر له حتى هو مكيدة ثم قتله - قتل نسيبو - بعدها مباشرة سيستدعي جعفر بن علي ابن حمدون وهو قائد الجيش الأندلسي في المغرب وقرّبه إليه واستفاد من قوته وعرف من عندو معلومات كثيرة على خبايا وأسرار الدولة ومؤسساتها فاش سالا منو دبّر له مكيدة حتى هو وقتله... دابا فاش كايقتل شي واحد من رموز الدولة كايدير فبلاصتو واحد من دياولو؛ اش ولا دابا هاداك الدريري الصغيور حاكم غير بالسمية ومسدود عليه فالقصر ولاّ بن أبي عامر هو الحاكم والآمر النّاهي في الأندلس على مرّ سنين عديدة، والطفل الصغير كبر على الاتّكال ماكيعرف يدير والو حيت السي ابي عامر كان كايدير كلشي بعد خمس سنوات من تولي الطفل الحُكم محمد بن أبي عامر بكل وقاحة غادي يسمي راسو "الحاجب المنصور"، وهاد اللقب كان يختصّ به الملوك والخلفاء فقط.. وأصبح يُدعى له على المنابر ودار الاسم ديالو  فالفلوووس والكتب، وبنى مدينة جديدة في شرق قرطبة على غرار عبد الرحمن الناصر الذي أسس مدينة الزهراء وسمى المدينة الجديدة "العامرية" ونقل لها كل دواوين الحكم والوزارات وأنشأ له قصراً كبيرا هناك وأصبحت مدينة العامرية هي المدينة الأساسية في الأندلس. في عام 381ه ابن أبي عامر غادي يستخلف ابنه في رئاسة الحكومة وهادي أول مرة غاتكون حيت اللي معروف هو أن الملك لي كايخلفو ولدو هاد خونا بدل القانون باش يستخلف ولدو من موراه... في عام 386ه "الملك الكريم" وذلك تمهيدا لإقامة ملكٍ جديد ماتنساوش هنا راه هشام بن الحَكَم كايكبر ولكن السيد مسالي مايعرف ما يقدم و لا يوخّر داير بحال الأمانة، وبدأ العامريون يكثرون في أماكن الحكم والمناصب الحسّاسة وبدأ في تكوين ما يسمى "بالدّولة العامرية" من 366ه حتى 399ه -حكم فيها- ولكن أنا وياكم غادي نعتبروها داخلة في فترة الخلافة الأموية، حيت مازال الخليفة ولو بشكل صوري خليفة أموي؛ دابا بن أبي عامر من قبيلة يمنية آش دار أقصى المدريين والأمويين من الجيش وخلا فيه غير الأمازيغ واليمنيين هادشي دار لينا الفتنة آ السي محمّد.
المؤرخين جاو حتى لعند هاد الشخصية في التاريخ الإسلامي وحاروا علاش حيت السيد واخا خبيث وقتل ثلاثة الناس باش يوصل للحكم ولكن سجل له هذا التاريخ بزاف ديال الحوايج زوينين: كان مجاهد وغزا في حياته 54 غزوة وماخسر فحتى وحدة - وصل في فتوحاته الى أماكن لم يصل لها حتى بن نصير وباقي الفاتحين منها خليج بيسكي والمحيط الأطلسي في الشمال - تحرك على رأس جيش كبير وحرر ثلاث نساء من نساء المسلمين أسيرات عند مملكة ناڤار لي كانت مصالحة مع الأمويين على الجزية. فاش وصل ابن ابي عامر حاكم ناڤار تعجب قاليه ياك اودي لاباس قاليه العامري آرى لينا لعيالات راه عندك مخالفة وصدق الحاكم ماعارفش بأمر النسوة ولقاو أن غير واحد الجندي سخن عليه راسو وأسرهم، فعاقبوه وأرسل حاكم ناڤار رسالة اعتذار شديدة لمحمد بن أبي عامر - واحد النهار كان غادي كي يعبر مضيقا في الشمال بين جبلين في طريقه لفتح بلاد النصارى، فنصبوا له كميناً وخلاوه حتى دخل بجيشه كاملا إلى المضيق وسدوّ عليه طريق العودة إلى قرطبة، وغادي يطلييييهم آش غايدير ليهم كمل طريقو إلى الشمال واحتل واحد المدينة ديال النصارى وخرّج منها سكانها الأصليين وعسكر هو وجيشه فيها بعد ما فرّق عليهم المنازل وتحصّن فيها فترة من الزمن واتخذها مركزاً له، وبدا كيسيفط منها السّرايا إلى أطراف ممالك النصارى وكاياخد الغنائم ويقتل ليهم الجنود وفين كايلوحهم؟! فالمضيق لي دارو ليه فيه الكمين.. واااا ناري قهرهم ومحّنهم جاو عندو قالو ليه هااا لعار حبس هادشي ونعطيوك لي بغيتي قاليهم: ماشي مشكل ولكن عندي شروط؛ قول أخويا: قال لهم: أولا يفتحوا المضيق لي سدوه فوراً قالوا ليه واخّا! قاليهم غاتنقيو ليا الطريق من الجثث المرمية على طول المضيق.. نقاااوها ليه وصاوبوها. ثالثا قاليهم غاتهزو ليا الغنائم لي خديت ليكم وتوصلوها ليا حتى لقرطبة وااا هزوووها ليه.. واااا ناري ميمتي  خطيييير.. آش دار تاني؟ ضاعف من مساحة مسجد قرطبة كيفاش؟ بدا كيشري الديور لي دايرين بيه وحدة بوحدة كايريبهم وكايزيد في مساحة المسجد -لم تقم أي ثورة في عهده وكان الأمن والأمان سائد في ربوع البلاد-.
المهم هادي فكرة عامة على الرجل وعلى فترة حكمه وماتنساوش أنه كان الحاكم من وراء الستار. 
مات الحاجب المنصور واستخلفه على الحجابة ابنه عبد الملك بن المنصور لمدة ثلاث سنوات 392 ه حتى 399 ه سبع سنين وحتى هو كان الحاكم من تحتها وهشام ابن الحكم كان عند بداية ولاية ابن المنصور عندو 38 عام وهاكّاك ماعمرو طلب الحكم و لا حاول يحبس حكومة الظل!! فييينك آ عبد الرحمن الداخل فييينك عبد الرحمن الناصر. 
في 399ه غادي يموت عبد الملك ابن المنصور في إحدى الحملات على النصارى ويتولى أخوه عبد الرحمن بن المنصور الحجابة، وحتى هو أدار الأمور من وراء الستار، ولكن كان مختلفا عن أبيه وأخيه كان مسيكين مبلي وتابع لالة ومالي وتقرقيب السطالي ماعندوش مع هادشي ديال الجهاد والحكم وطلب السلطان باغي غير يعيش، والخطير أن أم عبد الرحمن بن المنصور السكّير كانت هي ابنة ملك ناڤار.. بنادم كايشوف فيه شوفة ناقصة حيت الأم ديالو نصرانية؛ استطاع هذا السكَير إقناع الخليفة هشام بن الحكم بأن يجعله وليا للعهد من بعده خرَجْ ليها طاي طاي بعدما كان أبوه وأخوه كايتفداو هاد الطلب... فغضِب بنو أمية لهذا الأمر ولقاو أن المنصور داير العامريين في كل مكان كيفْ سبق وشرحنا الفوووق مايقدروش يهزو الراس - ولكن استطاعوا خلع هشام بن الحكم من العرش بالقوة ودارو فبلاصتو واحد الراجل من بني أمية اسمه محمد بن هشام بن عبد الجبار بن عبد الرحمن الناصر، حتى هو من أحفاد عبد الرحمن الناصر ودبروا مكيدة لعبد الرحمن بن المنصور السكّير وقتلوووه وانتهى بذلك عهد الدولة العامرية.
بعد هذا انفرط العقد مرة أخرى ورجعات السيبة إلى بلاد الأندلس بعد مُلك عظيم وكيفاش الكل كان يتودد لعبد الرحمن الناصر وابنه، وكيفاش ولاّت حضارة عظيمة عاود تاني غادي ترجع الثورات والفوضى بعدما رجعات الدولة الأموية أكثر قوة من ذي قبل.. سقطت سقوطا سريعا ولكن شنو السّبب؟! فين كان الضعف باش عطانا هذه النتيجة؟!: أولا القضية بدات منذ عبد الرحمن الداخل وما عاشه أهل الأندلس من ترف ورخاء وإنفاقه الكثير على المعمار والبناء والتشييد، مثلا قصر الزهراء على اتّساعه كان مبطّنا بالذهب (لفلوس موجودة) بل ويعاب على هذا الحاكم أنه من كثرة الاموال والغنائم مابقاش عارف شنو يدير بيها وصار يبذّرها يمينا وشمالا؛ الخطأ الكبير ديال انه ولى طفلا على الحكم  يعني أُسندت الأمور لغير أهلها - بالرغم من تولّي محمد بن هشام بن عبد الجبار بن عبد الرحمن الناصر الذي لُقّب بـ "المَهْدي") حتى هو كان لا يعرف من أمور الحكم الا القليل ولا يعرف كيف يقود الأمور، يعني زرَگ فالإدارة غير خاد الحكم آش دار؟! شد العامريين فالحبس وقتل منهم عرّااام وانتقم من الأمازيغ الذين كانوا العون الرئيسي للعامريين؛ فأثار غضب الأمازيغ والعامريين وناضْت! هاد الأمازيغ ماسكتوش مشاو قلبو على واحد اسمه سليمان بن الحكم بن عبد الرحمن الناصر، يعني أخ هشام بن الحكم المخلوع (اييه هاداك لي خاد الحكم وهو طفل) وجابوووه ونصّبوه خليفة عليهم وبدا الصراع بين سليمان والمهدي واستعان سليمان في حربه على المهدي بملك قشتالة (جزء مُنشقٌّ من مملكة ليون) و دارت بينهم معركة حامية الوطيس فهُزم المهدي وأخذ سليمان بن الحكم الخلافة في الأندلسية في سنة 400ه... فيتوالى على الحكم بعده 13 خليفة بعد سليمان حتى 422 ه... 
هاداك المهدي هزم لكن ماماتش وهرب لطرطوشة وطلب العون أولا من الفتى واضح العامري ومن أمير برشلونة، هذا الأخير وافق على مساعدته لكن بشروط: 100 دينار ذهبية عن كل يوم قتال - دينار ذهبي لكل جندي عن كل يوم في القتال - في حالة النصر أخذ كل الغنائم- أخذ مدينة سالم. شروط تعجيزية وخبيثة وافق عليها المهدي فوقعت الواقعة في شمال قرطبة وانتصر المهدي في هذه المعركة فوفى بعهده لأمير برشلونة. 
ردوا البال راه حنا دابا فهاد 22 عام كانعيشو زمن الفتنة هاداك الفتى واضح العامري غادي يدير انقلاب على المهدي ثمّ قتل المهدي وبدأ هو يتولى الأمور. ذكي هاد الفتى واضح حتى هو مابغاش يكون فالواجهة بحال گاع العامريين خوفا من الثورات ومشى جاب هاداك هشام بن الحكم المخلوع من قبل. شحال لعبو بيه هاد لوليّد، حيت هبيل لقاه هو الأموي المناسب في تلك الحقبة.. سليمان بن الحكم واخا تْهزم.. ماماتش رجع كاينوعر باش ياخذ من حديد الحكم وفكّر تاني باش يستعين بملك قشتالة بحال الأول. هذا الأخير مشى حطها لهشام بن الحكم لي عاد رجعوه للحكم سخووووونة وقاليه كلشي وقاليه فالأخير شنو غادي تعطيني ياش مانعاونوش؟! قاليه هشام بن الحكم غادي نعطيك كل الحصون الشمالية للمسلمين في بلاد الأندلس. فتوسعت قشتالة جدّا وصارت حدود قشتالة أكبر من حدود مملكة ليون - ووقعت الكارثة - دابا راه سليمان وهشام بن الحكم إخوة وهاكاك وقعات بيناتهم حروب ومؤامرات ومكائد.. هاااا الما طاب هاااا الإخوة بداو كايتطاحنو بيناتهم.. مع هاد الفتنة هادوك العامريين ولاو كايهاجرو للشرق نحو ڤالينسا... الأمازيغ دارو قوة بيناتهم واستعانوا من الأمازيغ في المغرب ودارو بسليمان وأخرجوه من الحكم وقتلوه وتولى الخلافة رجل من الأمازيغ اسمه علي بن حمّود واستقرّ بقرطبة.. خوتنا العامريين مسكتوش مشاو قلبو على أموي آخر اسمه عبد الرحمن بن محمد بن عبد الله...إلخ، واحد من أحفاد النّاصر وحاربوا به الخليفة الأمازيغي الجديد فدارت الحرب بين العامريين والأمازيغ، فكانت النتيجة أن قتل في الموقعة القائدين (الأموي و الأمازيغي) وااا شوف على زهر، ولكن انتصر الأمازيغ في هذه المعركة أخيرا وتولى أخ علي بن حمود واسمه القاسم، فتوالت الصراعات بعد ذلك شي يضرب شي كيف قلنا حتى 422ه فهاد العام غادي يتجمعو عِلية القوم والعقلاء والعلماء حيت الناس عياو بهاد الفتنة وهاد المعارك واتفقوا على إسناد إدارة البلاد إلى مجلس شورى ماكين لا أمازيغ لا عامريين لا خليفة واتفقوا على عزل بني أمية تماما و إطلاقا عن الحكم ومايبقاوش مازال يضربو فيها الضربة، حيت صافي بقاو عا الدراري وكان ذلك دارو مجلس الشورى تحت رئاسة أبو الحزم بن جَهور من علماء الأندلس الكبار، ولكن كان كايحكم غير في قرطبة باقي المناطق بقات ممزقة وفيها الفتنة... بعد ذلك بأربع سنوات تقريبا بدأت الأندلس تُقسّم الى دويلات صغيرة ويبدأ بذلك عهد دُويلات الطّوائف.. سبع مناطق أساسية: بنو عباد خادو اشبيلية وهم المولدين - بنو زيري خادو غرناطة من الأمازيغ- بنو جهوَر خادو قرطبة - بنو الأفطس خادو الغرب وسماوه إمارة بطليوس - بنو ذي النون خادو طليطلة - بنو عامر خادو شرق الأندلس ڤلنسية - بنو هود خادو سرقسطة.. دابا هاد الدويلات في وسطها دُويلااات كثيرة حتى وصل تِعداد الدويلات في الأندلس إلى 22 دويلة 600 ألف كلم مربع. 
ها احنا تقسمنا.. ها الفتنة.. ها الشّتات.. ها التفتّت.. ها غدايدي.
وا شووووف دابا فين كنا و فين ولينا.. 
الجزء القادم غدي نشوفو هل ستقوم للمسلمين قائمة؟! واش ممكن تجي شي معجزة ثالثة؟!