واحد خاينا قال للأب ديالو :"آجي آبا نوليو شرفاء"..جاوبو الشيبة العاصيا ديال باه وقال ليه: "باللاتي آولدي، حتى يموتو للي كا يعرفونا، ونديروها"...
سبب نزول هاذ المثلى ديالنا للي جبتها من تراثنا الفريد، هو شي كلام كان قالو سيدي ابن كيران في واحد اللقاء كان جمعو مع "الشبيبة" ديال البيجيدي بمناسبة الذكرى الخامسة لانطلاق حركة 20 فبراير...رئيس حكومتنا، كشف للدراري ديالو " عن معطيات خطيرة تعود لسنة 2003" –حسب ما عنونه أحد المواقع الإخبارية ديال بلادنا-...آش قال ثاني؟؟؟
قال ليك بللي واحد الشرذمة ديال شي "شخصيات نافذة" تجمعات "في السر" وقررات تفرض على المغاربة مساكن نظام كا يشبه لنظام زين العابدين بنعلي، من خلال فرض "نظام بوليسي ونظام الحزب الوحيد من أجل التحكم في دواليب الدولة"...
راكم فهمتو...خونا هنا راه كا يقطر الشمع على البام، واخا ديك الساعة في 2003 حتى قمقوم ما كان كا يفكر يدير شي حزب جديد يكون ديال فؤاد عالي الهمة ولا ديال ماوتسيتونك ولا حتى ديال شيكيفارا ولا شاوسيسكو...سيدي ابن كيران هنا كا يدير قراءة "بعدية بأدوات الحاضر"، وللي هي قراءة يمكن ليها تجني بزاف بزاف بزاف على الحقيقة وتقتلها...ما علينا...هاذاك شغلو معا إلياس العماري...
سيدي ابن كيران كا يزيد ثاني وكا يقول لوليداتو بللي شي أشخاص سامين، ومن الفوق بزاف بزاف، وصلو كاع في شي جلسات سرية أنهم يقررو "تجفيف منابع الإسلام بما في ذلك ليس حل حزب العدالة والتنمية وإغلاق دار الحديث الحسنية...وعن طريق العنعنة ديال زمان، كا يقول بللي هاذ المصيبة حكاها ليه وزير الأوقاف والشؤون الإسلامية السابق سيدي عبد الكبير العلوي المدغري...وأنه “ولولا هذا التنبيه الذي كشفه المدغري لكنتم اليوم في مغرب آخر لأن هذا التحكم ديال هاذ القماقم ماكانش غادي يكون خطر غير على الإسلام بل خطر على جميع المغاربة...
خوكم ديك الساعة كان "شاهد على العصر" كيما كا يقولو هاذوك الشلاهبية ديال "جزيرة" بول البعير...آش كيبان ليا؟؟؟
16 ماي 2003 وقعات ديك الطرديكة ديال كازا، زعما الهجمات الإرهابية الآتية من سيدي مومن ودوار السكويلة... واخا مزيان..ولكن راه هاذ المصيبة سبقاتها بزاف ديال الحوايج الخطيرة جدا مازال المغاربة عاقلين عليها...كان ذاك العتروس ديال زكرياء الميلودي ورباعتو منوضين الحراقية في ناحية سيدي معروف وللي بيضاوا كانو كا يسميوها "الشيشان"...وكانت مجموعات أخرى قتلات ونهبات ناس أبرياء باسم "الأمر بالمعروف والنهي عن المنكر" ديال آخر زمان...هاذ الشي آسيدي ابن كيران راه موثق في أرشيفات جريدتي "المستقل" و L’Indépendant ، لأن خوك راه كان مكلف بهيئة تحرير ديال هاذ القيامة مع ثلة من الصحفيين والمثقفين منهم خالد الجامعي، منهم يونس العلمي، منهم مصطفى عنترة ومنهم حتى سيدي محمد أثركين للي راه اليوم قاضي في المجلس الدستوري، ومنهم آخرين لم تحضرني أسماؤهم...هاذ الناس ومعاهم باك أكنوش، كنا خدامين غير على هاذ "النقط السوداء" التي كانت تهدد المغرب في العمق باسم السلفية وذاك العجب...درنا روبورطاجات على التهميش العمراني لهاذ المناطق، التهميش الإداري، غياب المستلزمات الضرورية للعيش الكريم، الإديولوجية للي تسربات لهاذ المناطق وجعلات منها "مناطق خارجة على المجتمع وعلى سيطرة الدولة نفسها"...وقلنا :"راه المغرب ما كا يشكل استثناء حتى وزة، وراها جاياه جاياه"...
ولكن في نفس الوقت، آسيدي ابن كيران، كانت الصحافة ديالكم في هاذاك الوقت كتدخل فينا، وكا تهمنا بأشياء ماشي حتى لتما، وكا تدافع على هاذ القماقم بشتى الطرق...بل كانت كتحارب "المنكر" حتى هيا بطريقتها، وخاصة ضد "بؤر المنكر" للي هيا الأوطيلات والحانات ومحلات ديال "لالة ومالي"...وبالتصاور ديال ديك الأماكن، وبعناوينها آحنيني...ثم واحد النهار ديال ماي 2003، وهيا تقول :"الطك" في أوطيل "فرح" وفي "لاكاسا دي إسبانيا" وغيرها...هنا فين بدات آحنيني مقالات الرأي كا تقاطر، وبدات الخرجات الإعلامية للي كاتنادي بحل البيجيدي من خرجة الصديقة والأخت لالة سميرة سيطايل في برنامج "تييري أرديسون" للي حنات للحزب ديالكم بداك الشي للي على بال الجميع، ومنها حتى مقالات زملاء كثيرين، وحتى مقالات الرأي ديال خوك أكنوش...وللي من بعد مدة قصيرة، مول الشكارة ديال الجريدتين، بقدرة قادر، وانتا عارف بلاشك كيفاش، قال ليا :"حبس المرقة آبا أكنوش، الوالد ديالي راه حتى هو خوانجي" !! وهي تتفرق ديك الرباعة ديال خوك، وكل واحد مشا دار شي حاجة اللي تريحو...
وعليه، راه والله ما كانت لا شخصيات نافذة تداولات في السر، ولا مخطط ديال قلب النظام إلى نظام الحزب الوحيد، لا سيدي زكري...آيييه، الكلام على حبيس المرقة مع تضخم الإنتاج "الديني الآتي من السعودية والخليج ومصر" كان جاري به العمل وكان كا يتقال وكا يتكتب...وكنا دايرين حنايا نوع من الشراكة مع "لوجورنال" في هاذ المجال، وإيلا عقلتي، راه ما فلتنا حتى جهة من الجهات...ما فلتنا بيجيدي، ما فلتنا دار الحديث الحسنية، ما فلتنا كتب التربية الإسلامية ديال المدارس والثانويات، ما وقرناش حتى سيدي عبدالكبير العلوي المدغري على الدور للي لعبو في "إستيراد الوهابية للبلاد" و"أخونة" فقهاء المجلس ديال الملك، واتقول ما خلينا شي جهة...حتى ما يسمى بإمارة المؤمنين للي كتب عليها باك أكنوش في "لوجورنال"، وكنتو نتوما نوضتو عليا الزعزاعا وتاهمتوني ببزاف ديال المصائب، ما فلتناهاش...
هذا كل ما في الأمر سيدي عبدالإلاه ابن كيران... أما الزعم بأن الأستاذ عبد الكبير العلوي المدغري قال ليك شي حاجة على شي شخصيات سامية تجمعات في السر باش توجد شي حاجة، راه ربما ولا كان عقلي كا ينفعني، راك غير ما فهمتيش قصدو...حينت واخا كون كانت صحيحة، والله لا قالها ليك..راه رجل دولة هاذاك، وكا يعرف آشنو هو "واجب التحفظ"، واشنو يقول واشنو ما يقولش...
"آبار" إيلا كانوا هاذ المثقفين والصحفيين هما للي كا تسميهم "شخصيات نافذة"..مع أنه حنا والله إيلا كنا غير رباعة ديال "هبش" وديال "الأوباش" وديال الصعاليك، وواقيلا كع راه باقين هكاك...وأنا بعدا كا يشرفني نبقا هاكاك...
