الخميس 28 مارس 2024
كتاب الرأي

أحمد الحطاب: واش فكَّرتِ مزيان يا للي كَتْبيع صوتْك ب 200 درهم؟

أحمد الحطاب: واش فكَّرتِ مزيان يا للي كَتْبيع صوتْك ب 200 درهم؟ أحمد الحطاب

إلا شدِّتيها، هادي علامة كتبَيّنْ علا أنك ما فكرتيش مزيان. يالاه فكّرتِ فديك اللَّحظَ لشديتيها فيها. ولا  بغيتِ نوضح ليك كْثرْ، راه التفكير ديالك ما مْشاش بعيد.

 

1.     واش فكّرتِ باللي لكيشري الأصوات راه قادر يشري 50 و100  صوت و كْثَرْ و راه قادر يخسر 20، 30 و حتى 50 مليون سنتيم باش يشريهم. علاش؟

 

2.    ما تݣولشْ ليَ راك ما عارفش. راه كيشري صوتك و صوت لُخْرين باش يتربّعْ على كرسي الجماعة لمدة 6 سنين و يبدا إصول و يْجول و بالو مشغول غير مْعَ  كيفاش يرد فلوسو مضروبة في 10 و لا 20. و علاش كيخسر هاد الفلوس كلها؟ راه حيتْ ما دْمرش عْليها و ما تْكرفسش و ما عْرقش باش يربحها. راها فلوس الحرام جاية من التخلويض و الغش و النفاق و التشلهيب و النصب و التجارة في المُحرَّمات.

 

3.    أجي انتَ. كيفاش كتدير باش تربح ديك ل50 و لا حتا 100 درهم في النهار؟ بلا ما تݣول لِيا. راني عارف بلا كتكرفس عليها بزاف و كتواجه من أجْلْها الصُّعوبات من طرف السلطات و المقدم و الشيخ و المخازنيا...

 

4.    كون كانت هاد لفلوس ديال لحلال عْرَق و تْكرفس عليها واش غادي يجي و يْلوحها بهاد السهولة. و نزيدك راه كاين لكيݣول بللي راه باغي غير إديرْ الخير. واش هاد الخير ما كيبان ليه غير في الوقت ديال الانتخابات. أنا بعدَ كنعرف بللي الخير ما عندو وقت.

 

5.    غادي تݣوليَ راك فقير و محتاج. عندك الحق و لكن راه كاين بزاف ديال الناس ضُعفا و فُقرا و لكن ما كيبيعوش صْوتهم.  ولكن داك الشي لما فكّرْتِيش فيه مزيان هو هاد الشي للي غادي نݣول ليكْ.

 

6.    بعْتِ صوتكْ ب 200 درهم. يعني داك للي شرا صوتك غادي يتمتع بيه في مدة 6 سنين غيرْ ب200 درهم. و دابا خلينا نقسمو 200 عْلَ 6 سنين. غادي تجيك أسيدي 33 درهم في العام و بعض السنتيمات و 2 دْراهم و بعض السنتيمات في الشهر و ما كاملاش جوج دريال في النهار.

 

7.    واش انتَ رخيص تالْ هاد الدرجة. و انت دابا احتقرت راسك براسك. ما حدك عايش في الدنيا خاصك تعطي قيمة لراسك باش الناس يحترموك و ما يجيوْشْ بحال هاد الشلاهبيا يضحكو عليك.

 

8.    واش عرفْتِ آش دْرْتِ ملي بعتِ صوتك ب 200؟ راك دْفنتِ راسك و دْفنت و ولادك و مْدينتك على الأقل لمدة 6 سنين. واش عرفْتِ أشنو غايدير داك للي بْعتِ ليه صوتك ب 200 درهم فهاد ست سنين؟

 

9.    راه غادي يخدم الغش و التزوير و التشلهيب و التلاوي و تحرميات باش يرجّعْ لفلوس لي عطاك انت و اعطا لخرين مْضوبلا و مْتلتا و يمكن ݣاع مضروبة في 10 و لا كْثرْ. آش غادي تدير انت بجوج دريال في النهار؟ واش باقية شي حاجة فهاد الوقت كتسوى جوج دريال و لا حتى 10 دريال. ربطة دنعناع أقل شي بدرهم.

 

10.    واش كتعرف بللي لفلوس للي كاينة في الجماعة باش اتّْصْلح بها لبلاد راه جاية من الضرائب للي كنخلص أنا و انت و هذا و هذاك و لخْرين و كلنا كاملين؟

 

11.    واش كتعرف بللي انت كتخلص في الضريبة كْثَرْ من ديك 200 درهم للي بعْتِ بها صوتك. راه إلاَ شريتِ الݣارو راك كتخلص الضريبة و إلاَ استهلكتِ الما راك كتخلص الضريبة و إلا استهلكتِ الضو راك كتخلص الضريبة و حتى ݣاع إلا كنتِ مريْيّحْ في دارك و كتفرج في التلفزة راك كتخلص الضريبة...

 

12.    و فكر مزيان عفاك. واش بغيتِ فلوس الضريبة تستافد منها انت و ولادك و حَومتك و مْدينْتك؟ واش بغيتِ حَومتك يوصل ليها الما و الضو و الواد الحار و النظافة و ولادك يلقاوْ فين يلعبو و فين يشمو هْوَ نقي؟ واش بغيتِ لبلاد يكون فيها اسبيطار مُهِمْ و مركز ديال التكوين المهني و مركز ديال تصفية الدم و ملاعب ديال القُرب؟ و لا بغيتِ يستولي عليها هذاك للي شرا صوتك ب200 درهم و في رمشة عين يولِّي من الأغنياء؟

 

13.    راه غادي يولي من الأغنياء على ظهرك و ظهر لخرين للي باعو ليه صوتْهم بحالك. راه بالتخلويض يقدر يجْلْوجْ  في العام من 200 حت لْ 400 مليون سنتيم. يعني ما بِين 30 و 60 مليون فالعام و ما بِين 3 و 5 الملاين في اشهر. راه هادي مانضا كثر من ديال البرلماني و قريبة من ديال الوزير. و من جاية لفلوس؟ راه جاية من فلوسك و فلوسي و فلوس لخرين. واش هاد اللشي للي بغيْتِ؟ و شفتي شحال بعْتِ راسك رخيص. كون كنتِ عاطي لراسك القيمة ما يجي حتى واحد يتفلا عليك.

 

14.    واش شفتي فين وْصلْتِ مللي ما كتفكرش مزيان مللي ما كتشوفش بعيد. بعْتِ راسك رخيص و بلا فايدة و فتحتِ الباب للي ما عندهم ضمير باش يستغلو الضعف و الفقر ديالك و ينهبو المال العام. أشنو ربحتِ انتَ؟ حالتك هي حالتك هاد الشي إلاَ ما تكفساتش.

 

15.    واش عرفتِ أش غادي يديرو بالمال الحرام هادوك اللي بعتِ ليهم صوتك ب 200؟ راه يمكن ليهم يقرِّوْ ولادهم في الخارج و يشريوْ ليهم السيارات و يبنيوْ ليهم الديور و مللي يسالِوْ قرايتهم غادي يعطٍوْ الرشوة باش يخدموهم في أحسن منصب و يمكن ݣاع يديرو ليهم المقاولات. هاديك الساعة كن على يقين أنهم غادي يعتبروك بحال شي حشرة.

 

16.    راه تا حاجة ما غاديا تبدل إلاَ بْقيْتِ كتبيع صوتك لِللِّي ما عندهم ضمير. راهم فاسدين قبل ما يدخلو لنتخابات و راه كيشرِوْ الأصوات حيت الناس عارفينهم فاسدين و ما غيصوتوش عليهم. و باش يتمادوْ في الفساد ديالهم الحل الوحيد هو يشروْ الأصوات ديال الناس الضعفاء و للي في غالب لحيان ما كيعرفوش أشناهي حقوقهم و واجباتهم.

 

17.    واش عمرك شفتِ شي واحد ناجح في لنتخابات ديال الجماعة كيسول في الناس للي صوتو عليه. راه يمكن يتلاقاهم في الطريق و ينكرهم و ما يسلمش عليهم ݣاع. هاد الشي إلا كانت عندو الجرأة يتسارا في الطريق كأيها الناس.

 

18.    واش عمرك شفتِ شي جماعة مسيطرين عليها للي كيشريوْ الأصوات دارو شي مشاريع كتحمّر لوجه؟ و حتى ݣاع إلا دارو المشاريع راه ما كيديرو غير المشاريع لكتْفِيدهم هما يعني لكيربحو مْنها هما و ولادهم و العائلة ديالهم و اللي مشاركين معاهم في الفساد؟

 

19.    أما انت راك غير تْحُطْ الورقة ديال لِنْتخاب في الصندوق و تخرج من القاعة ديال لنْتخاب ما كتبقى تساوي عند للي بعتِ ليه صوتك والو راه كتصبح غير نميرو مجهول حيتْ هو ما جايش لجماعة باش يدافع عْلَ مصالحك جاي باش يدافع عْلَ مصالحو هو و باش يعمر جِيبو. أما انت راه دوخك ب 200 درهم و شوف أشنو تدير بها في ست سنين.

 

20.    و اش عارف بللي انت مواطن عندك حقوق و عْليكْ واجبات وُ مْن بِينْ هاد الواجبات أنك تْبينْ المواطنة ديالك و ترفض الناس لما عَنْدهم ضمير اللي القصد ديالهم هو يَتْلاعبو بالإرادة ديالك بأبخس ثمن و ديروك طريق باش يوصلو الجماعات باش ينهبو المال العام للي هو في الحقيقة ديالنا كاملين؟

 

21.    واش عرفتِ بللي مللي كتبيع صوتك ب200 درهم يعني بجوج دريال للنهار راك بعتِ راسك و ضميرك و شرفك و كرامتك و بعتِ ولادك و بعتِ حومتك و مدينتك و بعت حتى وطنك. و نزيدك راك حتى انت كتْساهمْ في نشر الفساد علاحقاش كتشجع للي ما عندهم ضمير و كتعطيهم فرصة باش يبْداوْ يمشِّيوْ لبلاد حسب الأهواء و المصالح ديالهم.

 

22.    راه راسك و ضميرك و شرفك و كرامتك و ولادك و حومتك و مدينتك و وطنك ما كيتْباعو ما كيتشراوْ. و لا بْعْتِهم راه بحال لِنْتَ ماشي عايش. علاش؟ لسبب بسيط هو : للي بعتِ ليهم صوتك ما عمرهم ما غيفكرو فيك. و لا ما فكروش فيك، راك بحال إلا انتَ ميت.

 

23.    واش بغيتِ صوتك تكون عندو قيمة في لِنتخابات؟ راه ما خاصكش تْبيعو لا ب200 درهم و لا بأقل ولا بْكْثرْ. صوتك راه قوة بين إدِّيك راه به تقدر تغيّر بزاف ديال لحوايج للي انت و ولادك محتاجين ليها.

 

24.    راه إلا أنا و انتَ و انتِ و هو و هي و هما و كلنا رفضنا باش نبيعو صواتنا راه غادي نقطعو الطريق عْلَ للي ما عندهم ضمير باش يوصلو للجماعات. و راه الحمد لله لبلاد مازال فيها ناس طيبين ناس مستقيمين ناس شرفاء ناس كيحبو بلادهم ناس كيخافو من الله ناس باغيين لبلاد تزيد القدام و يتْحيَّدْ منها الظلم و القهر و الحݣرة و الفقر.

 

25.    كنْظنْ راك فهمتِ كلشي للي ݣلتْ ليكْ. ما تخليش للي ما عندهم ضمير يتحكمو في مصيرك و مصير ولادك. هاد المصير راه عندو علاقة بصوتك. و مرة اخرى كنݣوليك صوتك قوة بين يديك. إلا نْدْمْتِ المرَّات للي فاتو علاش بعْتيهْ ما تندمش هاد المرة. و إلا راه غادي ينسوك 6 سنين اخرى.

أحمد الحطاب فاعل مدني