الخميس 6 أغسطس 2020
كتاب الرأي

جلال كندالي : "حكومة دادوش لاسمن لاقلوش"

جلال كندالي : "حكومة دادوش لاسمن لاقلوش" جلال كندالي
دان داني
بن المداني
آه عليك يازماني
زمان الجوع والقهرا
الظلم لحفا ولعرا
واللي تكلم
خنيشيشو يتهدم
ماكاينة هدرة
زايد ناقص
واش بغا يطرا
حميدة ولد الشعب
اجتهد وقرا
حصل على شواهد كثيرة
من هنا وبرا
وملي دخل بغا يخدم
قالو ليه سير تخرا
زمان بن زمان هذا
زمان الرعاوين ولحمير
امك امك زايدة الشا
عبيقادر ولد لمهاوشا
ولى وزير
البارح كان على دحشة
سارح النعاج بجنب البير
واليوم بان ف الشاشة
يخاف منو الباشا
والكوميسير
بالخبر حرفي كان يتعشى
واليوم مابقى قادو
محمر ولا ديسير
زمان بن زمان هذا
بالحق دابا ربي يدير تاويل
ويصاوب الحال
السما بجاه الرسول
تصب عليكم بالمال
لكن بشرط ماتخافوش
قولو السلامة ومتعجبوش
ماتكونو بحال ذاك المسخوط
يدور ف الزناقي ينفر ويصوط
خنونتو خارجة وشعرو مفتول
جيوبو عامرة طايب وهاري
يضرب على وترة كنبري صمك مشلول
يغني بصوت غليظ مع الدراري
حكومة دادوش
لاسمن لاقلوش
حكومة دادوش
لاسمن لاقلوش