الثلاثاء 19 مارس 2024
كتاب الرأي

محمد اكويام: تزوير تاريخ الملحون اللي هو ديوان المغاربة في "جماعتنا زينة"..

محمد اكويام: تزوير تاريخ الملحون اللي هو ديوان المغاربة في "جماعتنا زينة".. محمد اكويام

"سهرة جماعتنا زينة" اللي كيتابعها المشاهد مساء كل سبت فالقناة الاولى ديال فيصل العرايشي واللي رفعت شعار المحافظة على التراث والموسيقى المغربية هي أول من شوه هاد التراث اللي خدمو عليه الرواد جمعوه ووثقوه باش يحفظوه الشباب وتتوارث الاجيال بداية تشويه هاد التراث كان من خلال قصيدة الدمليج اللي أداها المنشط وكلها اخطاء وفوص نوت والفيديو ديال هاد القصيدة تجاوز الحدود وخلا شوهتنا تتسارى القارات الخمس..

بالأمس سهرة جديدة من سهرات جماعتنا شينة التي تحسب على قناة فيصل العرايشي تم فيها تزوير تاريخ الملحون اللي هو ديوان المغاربة لا نقول اغنية بل نقول قصيدة لأن عماد الملحون هو النص والنظم، وفحال اللي كيقولو: الملحون فراجتو فكلامو ثانيا: صاحب قصيدة اللطفية هو النظام أحمد الغرابلي وليس محمد الغربي كما هو مكتوب، وهو شاعر فاسي ينظم بالعامية وبالفصحى، عاش في عهد الحسن الأول وأدرك مولاي عبد العزيز وتوفي مطلع القرن العشرين، وقصيدة اللطفية نظمها على إثر فتنة بوحمارة وتداعياتها.

آسي الأكاديمي ياك قلت غادي تخرج التراث من العشوائية، وخا ما عرفنا كيفاش، حيث ما دارس موسيقى ما كتعزف شي آلة، وصوتك جد جد محدود، كنت غير تقرا القصيدة كاملة، وفالأخير غادي تلقى مولاها ذاكر سميتو واضحة بلا رموز:

يا راوي خود اقوافي ذكر بها ناس العقول جل الذكار

والناظم ماهو خافي الحاج احمد لغرابلي افصيح الاشعار

وإذا كنت أكاديمي ديال بصح راه غادي يكون فخبارك أن أكاديمية المملكة المغربية خرجت لحدود الساعة 11 ديوانا، منهم ديوان شاعر فاس الحاج أحمد الغرابلي، كنت ترجع ليه، باش تنسبو القصيدة لمولاها، لا لغربي ولا شرقي. والخطير فالأمر أنه معكم سي احمد عيدون الخبير فالموسيقى والغناء وزيد وزيد حتى هو دازتو هذي ولا غير كاتشرجيو  فالأسماء فداك الجينيريك باش تبررو الميزانية ديال 36 مليون  العيب ماشي فيكم لكن العيب فهذيك القناة اللي كتقبل بحال هاد الشوهة فهاد رمضان الكريم.