محمد البلبال بوغنيم: هشتاك فم الرحا
كذبت الرحا عل المنجل
كالت ليه:
شديت العسا حتى عييت
وزلق لساني
اطحني شعير
ودرا
وخرطال
وغربلني
بشطاطو...ماشي بالسيار
المنجل اللي كنت كنحتارم
كلمونو
قطع صبع خوه
فآخر سبولة.
جات ريح
من باب الجنان
الفوقاني
خلات الكاعا بلا تبن،
حنحن العود،
هرنط لحمار
هارجهم ومرجهم
وصل للفيسبوك
دارو فيديو كليب
كيسبو فيه
الرحا والمنجل
كالو ليهم علاش عضيتو البزولة
حتى سال الدم،
وغوتات الميمة
اح أناري
على ولادي نساو
حليب الصابا
و فطمة الجنان.
الكرموص إلى متكلعش
كيولي شريحة
والحوت الى متملحش
كيعطي الريحة،
يداوي على بوزلوم
ويشافي من لفضيحة
اوا كلعوا قبل ما يدود
ويطلق عسل
من فم الطيحة.
الهموم إلى ما تنشراتش على حبل الصابون كتولي قريحة
عس على فمك
رد بالك راه إلى تسرح المنجل
ميقدرش
يحصد حتى سبولة
والرحا إلى خطاتها
لعصا مدور حتى دورة.
حملت لحمارة بلا وقت
ولدات بغيل مزغب
حليبها رضعوه ولاد لغيال.
لبغيل
نواضرو خوضر
ومحشش حتى
كتبو عليه
بنات الوقت فالفايسبوك
ماعندو عقل
خلا الفدان عامر ربيع
ودخل لبحيرة
ماهرم ما كلا
غير رفستها برجليه
ماخلا لماليه ميكولو
باقا الرحا كدور
الناس كتموت
والعافيا زاندا فقلوب لخوت
الشواري إلى معمرتيه
مايعمر
والى خوتيه كيبقا يصفر
البردعة خوات بالحلاس
والدبرة كبرات بين الكتف والراس
عسي على فمك البهيما
كلشي ولا باين
العينين كيدويو قبل الفم
والمنجل تلوا على راسو
خايف من الرحى تطحنو
صوت الرحا جاب لي النعاس
حينت الصابا قليلة هذ العام
البركي طار نوض لعجاج
مولاه تابعو تالف
ماعارف شكون يعاونو
عس على فمك واحضي
اسوارك
لفقيه
باع الجلابة ولبس كوستيم
خضر
شافتو الرحا كالت
تايه مسكين
جلالبتو جات عليه
المنجل شككو فيها
كاليه
انت ماشي ديال
هذ لقياس
لبس كدك يواتيك ودير الساس
عس على فمك
انت بلاصتك ماشي هنا
بلاصتك الهيه
من بعد ضحك عليه
ملي قتلو كاليه
بلاصتك ماشي هنا
بلاصتك لهيه
المنجل كيضحك والرحا كتتحرك
والله يجيب شي صابا
باش نعمروا الكاعة
ونخيطو لفقيه الجلابة
الله يجيب شي صابة.